İsti havalarda sərinləmək üçün adətən soyuq içkilərə üstünlük verilir. Lakin araşdırmalar göstərir ki, bədənin sərinləməsində əsas amillərdən biri tərin buxarlanmasını təmin edən mühit şəraitidir.
İsti havalarda bir fincan isti çayın da bədənin sərinləməsinə kömək edə biləcəyi bildirilir.
“Live Forever? A Curious Scientist’s Guide to Wellness, Ageing and Death” kitabının müəllifi professor Con Treqoninq bildirir ki, isti içkilərin sərinləşdirici təsiri müəyyən şərtlərdən asılıdır.
Treqoninq avstraliyalı alim professor Ollie Ceyin araşdırmalarına istinad edərək qeyd edir ki, isti içki qəbul edildikdə orqanizmdə iki proses baş verir. Birincisi, içkinin bədənə istilik verməsi, ikincisi isə bunun nəticəsində tərləmənin artmasıdır.
İsti içki bədən temperaturunu yüksəldir və bu, daha çox tərləməyə səbəb olur. Tər dərinin səthində buxarlandıqda isə bədəndən istilik uzaqlaşdırılır və nəticədə insan sərinləyir.
Rütubətli havada isti içki sərinlətməyə bilər
Lakin tərin buxarlanması üçün ətraf mühitin uyğun olması vacibdir.
Küləkli şəraitdə tər daha asan buxarlanır. Rütubətin yüksək, havalandırmanın isə zəif olduğu mühitlərdə isə tər bədəndən axaraq uzaqlaşır və kifayət qədər buxarlanmır.
Bu səbəbdən isti və rütubətli havada isti içki qəbul etmək sərinlətmək əvəzinə bədən temperaturunun daha da yüksəlməsinə səbəb ola bilər.
Mütəxəssislərin fikrincə, isti havalarda əsas məsələ içkinin temperaturundan asılı olmayaraq kifayət qədər maye qəbul etməkdir.
İsti və soyuq içkilərin sərinlətmə baxımından bir-birinə qarşı böyük üstünlüyü yoxdur. Buna görə də içki seçimi əsasən insanın şəxsi seçiminə və ətraf mühitin şərtlərinə bağlıdır.
