Apple-ın gələn həftə təqdim etməsi gözlənilən iPhone 18 Pro seriyasında istifadə olunacaq A20 Pro çipi ilə bağlı yeni sızıntı ortaya çıxıb. Yeni görüntülər prosessorun xüsusilə qrafik imkanları və yaddaş arxitekturası baxımından ciddi yeniliklərə sahib ola biləcəyini göstərir.
QHT.az xarici mediaya istinadən bildirir ki, məlumata görə, A20 Pro Apple-ın smartfonlarında istifadə edəcəyi ilk 2 nanometrlik çip olacaq. Prosessorun CPU tərəfində isə böyük dəyişiklik gözlənilmir. Əsas yeniliyin GPU hissəsində olacağı və çipin 7 nüvəli qrafik prosessoru ilə təqdim edilə biləcəyi iddia olunur.
Bundan əlavə, yeni çipdə yaddaş bağlantıları və paketləmə arxitekturasında da dəyişikliklərin olacağı bildirilir. Apple-ın A20 Pro ilə WMCM (Wafer-Level Multi-Chip Module) texnologiyasından istifadə edəcəyi gözlənilir.
A20 Pro-ya aid olduğu iddia edilən ilk kalıp görüntüsünün Weibo-da paylaşılması da sızıntıların diqqətini artırıb. Görüntüdə xüsusilə GPU və yaddaş bağlantıları ətrafında əvvəlki nəsillə müqayisədə fərqli quruluşun olduğu görünür.
Apple-ın yeni A20 Pro çipinin real performans göstəriciləri isə iPhone 18 Pro seriyasının təqdimatından sonra məlum olacaq.
