İqtisadi və Sosial Araşdırmalara Yardım İctimai Birliyinin sədri və iqtisadçı-ekspert Eyyub Kərimli QHT.az-a özəl açıqlamasında ölkəmizdə düyü istehlakının və istehsalının artmasına baxmayaraq, idxaldan asılılığın qalmaqda davam etdiyini vurğulayıb. Kərimlinin sözlərinə görə, bu ilin proqnozlarına əsasən Azərbaycanda 20,000 ton düyü və çəltik istehsal olunacaq ki, bu da ötən ilin müvafiq dövrü ilə müqayisədə 25% çoxdur. Lakin ölkədə düyü istehlakı da keçən illə müqayisədə 17% artmışdır və bu göstərici idxala olan ehtiyacı daha da artırır.

QHT sədri qeyd edib ki, ölkəmizin iqlim şəraiti və kənd təsərrüfatı torpaqlarının xüsusiyyətləri geniş miqyaslı düyü istehsalını çətinləşdirir: “Düyü becərilməsi çətin və yüksək su tələb edən bir prosesdir. Ölkəmizin iqlim şəraiti isə bu sahədə məhdud imkanlar yaradır. Beləliklə, düyü istehlakını daxili istehsal hesabına tam ödəmək real görünmür. Lakin mövcud potensialdan maksimum yararlanaraq yerli istehsalı artırmağa çalışmalıyıq.”

Eyyub Kərimli əlavə edib ki, idxaldan tamamilə asılılıq arzuolunan olmasa da, praktiki olaraq bəzi məhsullarda qaçılmazdır. Onun fikrincə, idxaldan asılılığı azaltmaq üçün şaxələndirmə vacibdir: “Düyü idxalında müxtəlif ölkələrlə əməkdaşlığı artırmalıyıq ki, qiymətləri daha əlverişli səviyyədə saxlaya bilək. Məsələn, ötən il Pakistandan idxal olunan düyü növlərinə 15% güzəşt tətbiq olundu, bu isə qiymətlərin bir qədər aşağı düşməsinə səbəb oldu.”

QHT sədrinin sözlərinə görə, ölkədə düyü istehsalını artırmaq üçün kənd təsərrüfatı mütəxəssisləri tərəfindən müvafiq təhlillər və yeni təşəbbüslər həyata keçirilməlidir. Lakin iqlim şəraitinə və ölkənin torpaq xüsusiyyətlərinə uyğun məhdudiyyətlər səbəbindən yerli istehsal tam tələbatı ödəyə bilməyəcək. Bu səbəbdən, idxaldan asılılıq qalacaq, lakin qiymətləri sabit saxlamaq və müxtəlif bazarlardan faydalanmaq üçün idxal ölkələri şaxələndirilməlidir.

Eyyub Kərimli son olaraq bildirib ki, yerli istehsalın artırılması istiqamətində tədbirlər davam etməlidir, lakin idxaldan asılılığın düzgün idarə olunması və qiymətlərin əlçatan saxlanması üçün dövlətin dəstəyi əhəmiyyətlidir.

 

Pərvanə Fərhadqızı

QHT.az