SpaceXAI yeni süni intellekt modeli Grok 4.5-i təqdim edib. Şirkət yeni modeli indiyədək hazırladığı ən güclü Grok versiyası kimi təqdim edir və onun proqramlaşdırma, agent əsaslı tapşırıqlar, ofis işləri və məlumat yönümlü fəaliyyətlər üçün optimallaşdırıldığını bildirir.
QHT.az xariic mediaya istinadən bildirir ki, şirkətin açıqlamasına görə, Grok 4.5 eyni tapşırıqları rəqib modellərlə müqayisədə daha az hesablama resursu və daha aşağı xərc hesabına yerinə yetirə bilir. Modelin əsas üstünlüklərindən biri isə token səmərəliliyidir. Bildirilir ki, Grok 4.5 oxşar tapşırıqlarda aparıcı süni intellekt modellərindən təxminən iki dəfə daha səmərəli işləyərək daha sürətli nəticə təqdim edir.
Elon Musk X platformasında paylaşdığı açıqlamada Grok 4.5-in mürəkkəb tapşırıqlar üçün hazırlanmış Anthropic Opus seriyası ilə eyni səviyyədə olduğunu bildirib. O, daha sonra şirkətdaxili qiymətləndirmələrə əsasən modelin təxminən Opus 4.7 səviyyəsində performans göstərdiyini, lakin bunu daha yüksək sürət və daha aşağı xərc ilə etdiyini qeyd edib.
SpaceXAI-nin məlumatına görə, model Rust və C/C++ kimi mürəkkəb proqramlaşdırma dillərində kod yaza, tək bir sorğu əsasında tam işlək tətbiqlər hazırlaya bilir. Bundan əlavə, Grok Build platformasında standart model kimi təqdim olunan Grok 4.5 internet araşdırmaları aparmaq, çoxsəhifəli Excel sənədləri hazırlamaq, qeydlər yaratmaq, PowerPoint-də diaqramlar qurmaq və Word sənədləri tərtib etmək imkanına malikdir.
Şirkət bildirir ki, Grok 4.5 saniyədə 80 token (TPS) emal edir və eyni tapşırıqları yerinə yetirərkən müqayisə olunan modellərdən təxminən 4,2 dəfə az token sərf edir. Bu isə həm cavab sürətini artırır, həm də istifadə xərclərini azaldır.
Qiymətləndirməyə gəlincə, Grok 4.5 üçün 1 milyon giriş (input) tokeni 2 dollar, 1 milyon çıxış (output) tokeni isə 6 dollar təşkil edir. Müqayisə üçün, Anthropic Opus 4.7 modeli müvafiq olaraq 5 və 25 dollar, OpenAI-ın Sol modeli 5 və 30 dollar, Luna modeli isə 1 və 6 dollar qiymətlə təklif olunur.
Yeni modelin təqdimatı süni intellekt bazarında rəqabətin daha da gücləndiyini göstərir. SpaceXAI Grok 4.5 ilə yüksək performansı, sürəti və sərfəli qiyməti bir arada təqdim edərək OpenAI və Anthropic kimi aparıcı şirkətlərə ciddi alternativ olmağı hədəfləyir.
