ABŞ-da məhkəmə Apple şirkətinə qarşı iCloud xidməti ilə bağlı qaldırılmış iddianı rədd edib. İddiada şirkətin uşaq istismarı ilə əlaqəli qanunsuz məzmunun aşkarlanması və qarşısının alınması sahəsində kifayət qədər tədbir görmədiyi iddia olunurdu.
QHT.az xarici mediaya istinadən bildirir ki, məhkəmə qərarında iddiaçı tərəf Apple-ın hüquqi məsuliyyət daşıdığını sübut edəcək kifayət qədər dəlil təqdim edə bilməyib. Bu səbəbdən iddianın icraata qəbul edilməməsinə qərar verilib.
Apple isə məhkəməyə təqdim etdiyi mövqedə istifadəçilərin məxfiliyinin qorunmasının şirkətin əsas prinsiplərindən biri olduğunu vurğulayıb. Şirkət eyni zamanda uşaq təhlükəsizliyinin təmin edilməsi istiqamətində müxtəlif texnoloji həllər və hüquq-mühafizə orqanları ilə əməkdaşlıq mexanizmlərindən istifadə etdiyini bildirib.
Ekspertlərin fikrincə, qərar texnologiya şirkətlərinin istifadəçi məxfiliyi ilə onlayn təhlükəsizlik arasında balans yaratması məsələsini yenidən gündəmə gətirib. Bu mövzu son illərdə qlobal texnologiya sektorunda ən çox müzakirə olunan məsələlərdən biri olaraq qalır.
Məhkəmənin qərarının oxşar hüquqi mübahisələrdə də presedent kimi nəzərdən keçirilə biləcəyi bildirilir.
