Minimalist, geri çəkilə bilən qapı tutacaqları elektrikli avtomobillərin (EV) fərqləndirici xüsusiyyətlərindən birinə çevrilmişdi. Lakin mübahisəli dizayn hazırda Çində 4 milyondan çox avtomobili əhatə edən ən böyük geri çağırma əməliyyatının mərkəzindədir.
QHT.az xarici mediaya istinadən xəbər verir ki, Çində istehsal olunan 2,98 milyon Tesla avtomobilini əhatə edən geri çağırma gizli qapı tutacaqlarının fövqəladə hallarda tapılmasının və açılmasının çətin olması ilə bağlı təhlükəsizlik narahatlıqlarından sonra həyata keçirilib.
Geri çağırmadan təsirlənən digər markalar arasında Çin avtomobil istehsalçıları XPeng, Xiaomi və Geely də var.
Milyarder Elon Muskın Tesla şirkəti tərəfindən populyarlaşdırılan gizli qapı tutacaqları avtomobilin qapı panelinə inteqrasiya olunur və yalnız avtomobilə yaxınlaşdıqda çölə çıxır.
Xiaomi elektrikli avtomobillərinin iştirakı ilə iki ölümcül qəza baş verdikdən sonra bu dizayn Çində araşdırılmağa başlanıb. Qəzalarda elektrik enerjisinin kəsilməsinin qapıların açılmasına mane olduğu ehtimal edilir.
Tesla cümə günü bildirib ki, bəzi Model 3, Model Y, Model S və Model X avtomobilləri qapı tutacaqlarının salon örtüyü ilə eyni rəngdə olması və buna görə də “müəyyənləşdirilməsinin və istifadəsinin çətin olması” səbəbindən geri çağırılır.
Bu problem “şiddətli toqquşma nəticəsində avtomobilin aşağı gərginlik sisteminin sıradan çıxması” kimi fövqəladə vəziyyətlərdə sərnişinlərin və ya xilasedicilərin qapıları tez açmasına mane ola bilər.
Tesla geri çağırılan avtomobillərə xəbərdarlıq etiketləri yerləşdirəcəyini və qəza zamanı avtomobilin şüşələrini avtomatik endirəcək proqram təminatı yeniləməsi yayımlayacağını açıqlayıb.
Təsirə məruz qalan şirkətlərin dünyanın digər ölkələrində də oxşar geri çağırma həyata keçirib-keçirməyəcəyi hələ məlum deyil.
Çinli rəsmilər fevral ayında gizli qapı tutacaqlarının qadağan ediləcəyini açıqlamışdı.
1 yanvar 2027-ci ildən qüvvəyə minəcək yeni qaydalara əsasən, Çində avtomobillərin satılmasına yalnız qapıların həm daxili, həm də xarici hissəsində mexaniki açma mexanizmi olduqda icazə veriləcək.
Zəhra Mansırova
