“VƏTƏN FƏDAİLƏRİ” layihəsi çərçivəsində vətənpərvərlik görüşü keçirildi - FOTOLAR
2 aprel 2025-ci il tarixində 31 mart Azərbaycanlıların Soyqırımı gününün 107-ci, Şanlı Aprel döyüşlərinin 9-cu ildönü ilə əlaqədar Azərbaycan Dillər Universitetinin və “Qayıdış” İctimai Birliyinin birgə təşkilatçılığı ilə “VƏTƏN FƏDAİLƏRİ” layihəsinin rəhbəri, AYB-nin və AJB-nin üzvü Manya Səxavətqızı ilə görüş keçirildi.
QHT.az xəbər verir ki, görüşdə ADU-nun müəllim və tələbə heyəti ilə yanaşı Qeyri Hökümət Təşkilatlarının nümayəndələri də iştirak edirdi. Tədbir şəhidlərimizin əziz xatirəsini bir dəqiqəlik sükut ilə və Azərbaycan Dövlət Himni ilə açıq elan edildikdən sonra, ilk olaraq ADU-nun Qafqazşunaslıq və Azərbaycan tarixi kafedrasının dosenti, tarix üzrə fəlsəfə doktoru Bağırova Şəlalə Vaqif qızı qonaqları salamlayaraq görüşün əhəmiyyətini vurğuladı. “VƏTƏN FƏDAİLƏRİ” layihəsinin rəhbəri yazıçı, jurnalist Manya Səxavətqızı və layihənin dəstəkçisi Şahin Məmmədov ərsəyə gətirdikləri kitablar barədə məlumat verdilər və kitabları təqdim etdilər.
Görüşün təşkilatçısı “Qayıdış” İB sədri Hasil Tağıyev bu kimi kitabların və görüşlərin gənclərdə vətənpərvərlik hissinin aşılanması üçün vacibliyini vurğuladı. Tədbirin sonunda tələbələrə hədiyyələr verildi və xatirə şəkili çəkildi.