Cənubi Koreyanın KAIST universitetinin alimləri elektrikli avtomobillərdə istifadə oluna biləcək anodsuz batareyaların ömrünü uzatmağa imkan verən yeni texnologiya hazırlayıblar. Bu batareyalarda ənənəvi olaraq istifadə olunan qrafit anodunun olmaması onların daha yüngül və kiçik hazırlanmasına imkan verir.
QHT.az xarici mediaya istinadən bildirir ki, anodsuz batareyaların əsas problemlərindən biri doldurulma zamanı litiumun batareyanın daxilində nizamsız şəkildə böyüməsi və batareyanın ömrünü qısaltmasıdır. Tədqiqatçılar bunun qarşısını almaq üçün yarımkeçirici istehsalında istifadə olunan nanotexnologiya üsullarından yararlanıblar.
Yeni yanaşma litiumun daha bərabər şəkildə yerləşməsinə və batareyanın daxilində qoruyucu təbəqənin formalaşmasına kömək edir. Nəticədə batareyanın daha uzun müddət işləməsi və elektrikli avtomobillərin daha yüngül batareyalardan istifadə etməsi mümkün ola bilər.
Alimlər hesab edirlər ki, texnologiyanın inkişaf etdirilməsi gələcəkdə elektrikli nəqliyyat vasitələrinin enerji səmərəliliyinin artırılmasına və bir şarjla daha uzun məsafə qət etməsinə töhfə verə bilər. Lakin texnologiyanın geniş istifadəyə keçməsi üçün əlavə sınaqlara ehtiyac var.
Piranə Xasiyeva
