Azərbaycan Dövlət İqtisad Universitetinin (UNEC) rektoru Ədalət Muradov, "UNEC – 100 İnkişaf Strategiyası" çərçivəsində 2030-cu ilə qədər bütün təhsil proqramlarının beynəlxalq akkreditasiyadan keçməsini hədəflədiklərini vurğulayıb. Bu məqsədə nail olmaq üçün atılan addımların əhəmiyyətindən danışan rektor, FIBAA (Foundation for International Business Administration Accreditation) beynəlxalq akkreditasiya qurumunun 7 ekspertinin UNEC-in bir sıra tədris proqramlarının akkreditasiyasına başlamasını mühüm bir mərhələ kimi qiymətləndirib.
QHT.az xəbər verir ki, Muradov qeyd edib ki, beynəlxalq ekspertlər ixtisaslar, akademik heyət, tələbələr, məzunlar və sənaye təmsilçiləri ilə görüşlər keçirərək, ali təhsilin bütün aspektlərini müzakirə edəcəklər. Bu proses, UNEC-in tədris proqramlarının beynəlxalq standartlara uyğunluğunu təmin etməklə yanaşı, universitetin qlobal rəqabət qabiliyyətini artırmağa yönəlib: "Bu cür akkreditasiya prosesləri UNEC-in təhsil keyfiyyətini yüksəltmək, tələbələrin və məzunların beynəlxalq əmək bazarında rəqabətə davamlı olmalarını təmin etmək üçün vacibdir. Beynəlxalq akkreditasiyadan keçmək, UNEC-in tədris metodologiyasının, akademik proqramlarının və idarəetmə sistemlərinin beynəlxalq standartlara cavab verdiyini təsdiqləyəcəkdir".
Ədalət Muradov əlavə edib ki, UNEC-in bu strategiya çərçivəsində həyata keçirdiyi islahatlar və yeniliklər, universitetin təhsil sahəsində lider mövqeyini möhkəmləndirəcək və beynəlxalq əməkdaşlıq imkanlarını genişləndirəcək. Bu, həm də UNEC-in regionda və dünyada nüfuzunu artırmaq üçün atılan əhəmiyyətli addımlardan biridir.
Qeyd edək ki, "UNEC – 100 İnkişaf Strategiyası"nın yalnız akkreditasiya prosesləri ilə məhdudlaşmır, həm də innovativ tədris metodlarının tətbiqi, elmi tədqiqatların inkişafı və beynəlxalq əməkdaşlığın genişləndirilməsi kimi digər sahələri də əhatə edir. Bu strategiya, UNEC-in gələcək inkişafının və davamlı uğurunun təmin edilməsi üçün əsas rol oynayacaqdır.
Pərvanə Fərhadqızı
