1 sentyabr 2024-cü il tarixində Azərbaycanda keçiriləcək parlament seçkilərində bir çox QHT rəhbərləri və nümayəndələri də namizədliyini irəli sürüb.
QHT.az-ın araşdırmalarına görə, 59 saylı Quba seçki dairəsi üzrə "Xınalıq" Turizmin İnkişafına Dəstək İctimai Birliyinin sədri Yusif Abayev də namizədliyini irəli sürüb.
1980-ci ildə Quba rayonunun Xınalıq kəndində anadan olan Yusif Abayev, Milli Aviasiya Akademiyasının “Menecment” ixtisasını fərqlənmə diplomu ilə bitirib. O, Azərbaycan Respublikası Elm və Təhsil Nazirliyinin İqtisadiyyat İnstitutunun dissertantıdır və ADPU-nun Quba filialının şöbə müdiri vəzifəsində çalışır. Eyni zamanda, "Xınalıq" Turizmin İnkişafına Dəstək İctimai Birliyinin sədridir. Yusif Abayev 8 sosial layihənin və 30-dan çox yerli və beynəlxalq məqalənin müəllifidir.
Yusif Abayevin seçki platforması aşağıdakı əsas istiqamətləri əhatə edir:
- Regionlarda vətəndaşların maddi rifah halının yaxşılaşdırılması məqsədi ilə proqramlar hazırlamaq və onların icrasına dəstək vermək.
- Şəhid ailələri, qazilər və veteranlarla fərdi iş planı əsasında çalışaraq onların müraciətlərini dinləmək və problemlərinin həllinə dəstək olmaq.
- Qadınlar və gənclər üçün özünəməşğulluq proqramları vasitəsilə əmək məşğuliyyətini artırmaq və bu sahədə yardımçı olmaq.
- Əhalinin gəlirlərini artırmaq üçün alternativ yollar tapmaq və mikro, kiçik və orta sahibkarlıq subyektlərinin inkişafına dəstək vermək.
- Vətəndaşların ərizə, şikayət, müraciət və təkliflərini dinləyərək müvafiq dövlət qurumlarına çatdırmaq və problemlərin həllinə kömək etmək.
- Ayda iki dəfə vətəndaşları qəbul etmək və hər ay yerlərdə onların iştirakı ilə problemlərin həlli üçün təkliflər hazırlamaq.
- Sosial və iqtisadi problemlərin həlli üçün yerli icra hakimiyyəti və müvafiq dövlət qurumları ilə əməkdaşlıq etmək.
- Sosial həssas ailələr üçün icra olunan dövlət proqramlarından hər bir vətəndaşın faydalanmasını təmin etmək və qanunvericilik aktlarının yenidən işlənməsinə kömək etmək.
- Təhsilin keyfiyyətinin artırılması və insanların sağlamlığının qorunması üçün dövlət proqramlarının icrasına dəstək vermək.
- Dövlət siyasətini dəstəkləmək, dövlətə, vətənə, millətə və xalqa şərəflə xidmət etmək.
