Münaqişə bölgələrində təchizat zəncirinin pozulması və insanların kütləvi köçü adi sağlamlıq problemlərinin müalicəsini çətinləşdirir. Dərman və tibbi ləvazimatların çatdırılmasında yaranan fasilələr əhalinin sağlamlığına mənfi təsir göstərir.
QHT.az xarici mediaya istinadən bildirir ki, Ümumdünya Səhiyyə Təşkilatının (ÜST) Şərqi Aralıq dənizi üzrə Regional Ofisinin fövqəladə hallar üzrə direktoru Annette Heinzelmann bu barədə Berlin şəhərində keçirilən Dünya Səhiyyə Sammitində Devex nəşrinə açıqlama verib.
2024-cü ilin noyabrından bu vəzifədə çalışan Heinzelmannın rəhbərlik etdiyi qurum Yəmən, Livan, İran, Sudan və Fələstin əraziləri kimi münaqişə bölgələrini əhatə edir.
O bildirib ki, təchizat zəncirində yaranan fasilələr yalnız logistika problemi deyil, həm də insanların sağlamlığına birbaşa təsir edən ciddi məsələdir. Dərmanların və tibbi vasitələrin vaxtında çatdırılmaması, eləcə də əhalinin məcburi köçü insanların lazımi tibbi xidmətlərdən yararlanmasını çətinləşdirir.
