2025-ci ildə dünyanın ən böyük xeyriyyə qurumlarından biri olan Ford Fondu tərəfindən təxminən 2 min qrant təsdiqlənib. Fond il ərzində müxtəlif təşkilatlara ümumilikdə 973 milyon ABŞ dollarından çox vəsait ayırıb. Sosial ədalət, insan hüquqları, bərabərlik və ictimai inkişaf istiqamətlərində fəaliyyət göstərən təşkilatlar bu maliyyə dəstəyindən yararlanıblar.
QHT.az xarici mediaya istinadən bildirir ki, Nyu-Yorkda yerləşən və qlobal miqyasda fəaliyyət göstərən Ford Fondu 2025-ci ildə ən böyük qrant alan təşkilatların siyahısını açıqlayıb. Fondun maliyyə dəstəyi əsasən sosial dəyişikliklərin təşviqi, vətəndaş cəmiyyətinin gücləndirilməsi, insan hüquqlarının müdafiəsi və inklüziv inkişaf proqramlarının həyata keçirilməsinə yönəlib. Təşkilatlar arasında həm beynəlxalq qeyri-hökumət qurumları, həm də yerli təşəbbüslər yer alıb.
Məlumata görə, Ford Fondu ötən il ərzində yüzlərlə layihəyə dəstək versə də, bəzi təşkilatlar xüsusilə böyük məbləğdə qrant əldə edərək diqqət çəkiblər. Fond rəhbərliyi bildirir ki, maliyyələşdirilən proqramlar cəmiyyətlərdə daha ədalətli və dayanıqlı inkişafın təmin olunmasına xidmət edir.
Bununla yanaşı, beynəlxalq humanitar gündəmdə ciddi narahatlıq doğuran məsələlərdən biri də Afrikada Ebola virusu ilə mübarizə üçün ayrılan vəsaitlərin azalmasıdır. Afrika Xəstəliklərə Nəzarət və Profilaktika Mərkəzinin (Africa CDC) Ebola ilə mübarizə proqramına yönələn maliyyə öhdəlikləri son dövrlərdə əhəmiyyətli dərəcədə azalıb. Ekspertlər xəbərdarlıq edirlər ki, maliyyələşmənin zəifləməsi xəstəliyin yayılmasının qarşısının alınmasını çətinləşdirə bilər.
