Çinin süni intellekt startapı DeepSeek ilk maliyyələşdirmə raundu çərçivəsində təxminən 50 milyard yuan (7,4 milyard dollar) investisiya cəlb etməyə hazırlaşır. Məlumata görə, raundda Çinin aparıcı texnologiya və sənaye şirkətləri iştirak edəcək.
QHT.az xarici mediaya istinadən bildirir ki, məlumata əsasən, investisiya raundunda Tencent Holdings və CATL əsas investorlar sırasında yer alır. Mənbələrin bildirdiyinə görə, maliyyələşdirmədən sonra DeepSeek-in bazar dəyəri 350–400 milyard yuan (52–59 milyard dollar) arasında qiymətləndirilə bilər.
Şirkətin təsisçisi Liang Wenfeng layihəyə şəxsi vəsaitlərindən 20 milyard yuan yatırmağı öhdəsinə götürüb. Tencent-in 10 milyard yuan, CATL-in isə 5 milyard yuan sərmayə qoymağı nəzərdən keçirdiyi bildirilir.
Mənbələrin sözlərinə görə, NetEase, JD.com və Çinin milli süni intellekt fondu da investisiya raundunda iştirak etmək üçün yekun danışıqlar aparır. İnvestorların ümumi sayının 10-dan az olacağı gözlənilir.
DeepSeek 2025-ci ilin əvvəlində təqdim etdiyi V3 və R1 modelləri ilə beynəlxalq diqqət çəkərək Çinin süni intellekt sahəsində əsas oyunçularından birinə çevrilib. Şirkətin uğuru ABŞ-da Çinin AI imkanları ilə bağlı formalaşmış bəzi təsəvvürləri də yenidən gündəmə gətirib.
Ekspertlər hesab edirlər ki, bu investisiya raundu Çinin süni intellekt ekosistemini daha da gücləndirmək və ölkənin texnoloji müstəqilliyini artırmaq istiqamətində mühüm addım olacaq. Həmçinin, Tencent-in DeepSeek-lə yaxın əməkdaşlığı onun Alibaba və digər yerli rəqiblərlə rəqabətdə mövqeyini gücləndirə bilər.
