Afrikada ərzaq təhlükəsizliyinin gücləndirilməsi üçün enerji təminatının yaxşılaşdırılması vacib amillərdən biri hesab olunur. Mütəxəssislər enerji və kənd təsərrüfatı sahələrinin birgə fəaliyyətinin ərzaq sistemlərinin inkişafına mühüm töhfə verə biləcəyini bildirirlər.
QHT.az xarici mediaya istinadən bildirir ki, Qlobal Enerji Alyansının Afrika üzrə vitse-prezidenti Kerol Koeç enerji təminatının ərzaq sistemlərinə geniş təsir göstərdiyini vurğulayır. O, Keniyanın Mau meşəsi yaxınlığında yerləşən Olenguruone kəndində fermer ailəsində böyüyüb. Ailəsinin elektrik enerjisi və su təminatı olmayıb, təsərrüfat isə çox vaxt zərərlə işləyib.
Koeçin sözlərinə görə, bir il ailəsi yaxşı kələm məhsulu əldə etsə də, yolların yararsız olması səbəbindən məhsulu bazara çatdıra bilməyib. Saxlama imkanlarının olmaması da məhsulun qorunmasını çətinləşdirib.
Bu nümunə göstərir ki, enerji təminatı ilə yanaşı, yol infrastrukturu və məhsulların saxlanılması imkanları da ərzaq təhlükəsizliyinin təmin edilməsində mühüm rol oynayır.
