Şərq Tərəfdaşlığı Vətəndaş Cəmiyyəti Forumunun Azərbaycan Milli Platformasından QHT.az-a daxil olan məlumatda bildirikir ki, Sabina Ələkbərova 1 iyul 2026-cı il tarixindən etibarən Azərbaycan Milli Platformasının ölkə fasilitatoru və Şərq Tərəfdaşlığı Vətəndaş Cəmiyyəti Forumunun Rəhbər Komitəsinin Azərbaycan üzrə üzvü kimi fəaliyyətə başlayıb (https://eap-csf.eu/about/ )
Sabina Ələkbərova bu vəzifələrə Azərbaycan Milli Platforması çərçivəsində keçirilmiş seçkinin nəticələrinə əsasən seçilib. Onun yeni mandatı Milli Platformanın üzvləri arasında əməkdaşlığın gücləndirilməsinə, Platformanın fəaliyyətinin əlaqələndirilməsinə, üzv təşkilatların mövqelərinin Forum səviyyəsində təmsil olunmasına və Azərbaycan vətəndaş cəmiyyəti ilə regional və Avropa tərəfdaşları arasında dialoqun inkişafına xidmət edəcək.
Ölkə fasilitatoru Azərbaycan Milli Platformasının fəaliyyətinin əlaqələndirilməsində, üzv təşkilatlar arasında kommunikasiya və əməkdaşlığın təmin edilməsində, ümumi təşəbbüslərin hazırlanmasında və Platformanın Şərq Tərəfdaşlığı Vətəndaş Cəmiyyəti Forumunun strukturları ilə əlaqələrinin qurulmasında mühüm rol oynayır.
Şərq Tərəfdaşlığı Vətəndaş Cəmiyyəti Forumunun rəsmi məlumatına əsasən, Milli Platformalar hər bir Şərq Tərəfdaşlığı ölkəsində vətəndaş cəmiyyəti təşkilatlarını bir araya gətirir və Şərq Tərəfdaşlığı siyasətinin məqsədlərinin milli səviyyədə həyata keçirilməsinə dəstək göstərir. (Eastern Partnership Civil Society Forum)
Rəhbər Komitənin üzvü kimi Sabina Ələkbərova eyni zamanda Azərbaycan Milli Platformasının baxış və tövsiyələrinin Forumun regional idarəetmə və qərarların hazırlanması prosesində təqdim edilməsində iştirak edəcək. Rəhbər Komitə Forumun strateji istiqamətlərinin müəyyənləşdirilməsinə, fəaliyyətinin əlaqələndirilməsinə və müxtəlif ölkələrdən olan Milli Platformalarla işin təşkilinə töhfə verir. Komitə üzvləri ikiillik mandatla seçilir və Forumun ali qərarverici orqanı olan Baş Assambleyaya hesabat verirlər.
Şərq Tərəfdaşlığı Vətəndaş Cəmiyyəti Forumu 2009-cu ildən etibarən Azərbaycan, Ermənistan, Belarus, Gürcüstan, Moldova və Ukraynada demokratik inkişafı, sülhü, vətəndaş cəmiyyətinin gücləndirilməsini və Avropaya inteqrasiyanı dəstəkləyən regional platforma kimi fəaliyyət göstərir. Forum mindən çox vətəndaş cəmiyyəti təşkilatını birləşdirir, onların siyasət tövsiyələrini qərar qəbul edən tərəflərə çatdırır və vətəndaş cəmiyyəti təşəbbüslərinin inkişafına dəstək verir.
Azərbaycan Milli Platforması Sabina Ələkbərovanı yeni vəzifələri münasibətilə təbrik edir və ona Platformanın institusional inkişafı, üzvlər arasında əməkdaşlığın genişləndirilməsi, vətəndaş cəmiyyətinin mövqeyinin gücləndirilməsi və beynəlxalq tərəfdaşlarla əlaqələrin inkişafı istiqamətində uğurlar arzulayır.
