Avstraliyalı milyarder və Fortescue şirkətinin təsisçisi Endryu Forrest beynəlxalq investorları Ukraynanın iqtisadi bərpasına indidən hazırlaşmağa çağırıb. O, ölkənin enerji dayanıqlığının təmin edilməsini gələcək investisiyalar üçün əsas şərt hesab edir.
QHT.az xarici mediaya istinadən bildirir ki, Endryu Forrest müharibənin rəsmi başa çatmasını gözləməyin Ukraynanın bərpasına hazırlığı gecikdirə biləcəyini deyib. O, Ukraynanın bərpasına yüz milyonlarla dollar vəsait ayırıb və ölkə üzrə təxminən 5 milyard dollarlıq paylanmış enerji sistemi yaradılmasını təklif edib.
Forrest bildirib ki, əvvəllər Ukraynaya investisiyanın yalnız müharibə başa çatdıqdan sonra həyata keçirilməsini düşünürdü, lakin indi bu yanaşmasının yanlış olduğunu hesab edir. Onun sözlərinə görə, əsas problem Ukraynanın uzunmüddətli potensialına inamsızlıq deyil, müharibə davam etdiyi müddətdə investorların risk etməkdən çəkinməsidir.
Ukraynanın enerji sektoruna artıq beynəlxalq maliyyə dəstəyi göstərilir. Sentyabrın əvvəlində ABŞ Beynəlxalq İnkişaf Maliyyə Korporasiyası DTEK şirkətinə enerji saxlama sistemlərinin genişləndirilməsi üçün 85 milyon avro kredit ayırıb.
Forrest Ukraynada Fortescue-nin istifadə etdiyi modelə bənzər paylanmış ağıllı enerji şəbəkəsi yaradılmasını təklif edir. Sistem geniş əraziyə yerləşdirilən batareyalar və süni intellekt vasitəsilə hücum və ya qəza zamanı elektrik enerjisinin digər hissələrə yönləndirilməsini təmin etməlidir. Layihə üçün təxminən 20-21 giqavat-saat enerji saxlama gücü tələb olunur.
Onun sözlərinə görə, enerji dayanıqlığı təmin edildikdən sonra Ukraynanın kritik faydalı qazıntılar və mədənçilik sektoruna da investisiya imkanları yarana bilər. Ukraynanın dünya üzrə kritik mineral ehtiyatlarının təxminən 5 faizinə sahib olduğu bildirilir. Lakin mineral sərvətlərin təxminən 40 faizi Rusiya tərəfindən işğal olunmuş və ya cəbhə xəttinə yaxın ərazilərdə yerləşir.
Hazırda Forrestin əsas prioriteti Ukraynanın enerji infrastrukturunun gücləndirilməsidir.
