Hələ də öyrənilən cihaz impulslu radio dalğaları yaradır və tərkibində rus komponentləri ola bilər.
QHT.az xəbər verir ki, CNN-in məlumatına görə, ABŞ Müdafiə Nazirliyi gizli əməliyyat zamanı əldə edilən və “Havana sindromu” ilə əlaqələndirilən şübhəli bir cihazı bir ildən çox sınaqdan keçirib. Cihaz Bayden administrasiyasının son günlərində milyonlarla dollara alınıb və impulslu radio dalğaları yaydığı iddia olunur. Bəzi mütəxəssislər bu texnologiyanın ABŞ diplomatları, casusları və hərbçilərində müşahidə olunan sirli sağlamlıq problemlərinə səbəb ola biləcəyini düşünürlər.
Mənbələr cihazın portativ olduğunu, hətta bel çantasına sığdığını bildirir. Tamamilə Rusiya istehsalı olmasa da, Rusiya komponentləri ehtiva etdiyi qeyd olunur. Rəsmi dairələrdə hələ də qəti nəticə yoxdur və mövzu mübahisəli qalır.
Havana sindromu ilk dəfə 2016-cı ildə Havanada ABŞ diplomatlarında baş ağrısı, başgicəllənmə kimi simptomlarla qeydə alınıb və sonradan dünyada başqa hallara da rast gəlinib. Bəzi zərərçəkənlər Rusiyanı günahlandırır və ABŞ hökumətinin mövqeyindən narazıdır. ABŞ rəsmiləri isə xarici hücumla bağlı yetərli dəlil olmadığını bildirir, amma məsələni o qədər ciddi sayırlar ki, Konqres komitələrinə məlumat veriblər.
