Yeni elmi araşdırma göstərir ki, gündəlik fiziki aktivliyin kiçik bir hissəsini belə yüksək intensivliklə yerinə yetirmək sağlamlığa ciddi müsbət təsir göstərir. European Heart Journal jurnalında dərc olunan tədqiqat bu yanaşmanın bir sıra xroniki xəstəliklərin riskini azaltdığını ortaya qoyub.
QHT.az xarici mediaya istinadən bildirir ki, araşdırma çərçivəsində Böyük Britaniyada təxminən 470 min insanın 9 il ərzində fiziki fəaliyyəti izlənilib. Nəticələrə görə, ümumi aktivliyinin cəmi 4 faizini yüksək intensivlikli məşqlərə ayıran şəxslər heç idman etməyənlərlə müqayisədə daha sağlam olub.
Tədqiqat yüksək intensivlikli fəaliyyətin bir sıra xəstəliklər üzrə riskləri azaltdığını göstərib. Bunlara demans, 2-ci tip diabet, ürək-damar xəstəlikləri, xroniki tənəffüs və böyrək problemləri, eləcə də ümumi ölüm riski daxildir.
Mütəxəssislər bildirirlər ki, yüksək intensivlikli məşqləri müəyyən etməyin sadə yolu “nitq testi”dir. Əgər məşq zamanı yalnız qısa sözlər deyə bilirsinizsə və nəfəsiniz sürətlənirsə, bu fəaliyyət yüksək intensivlikli sayılır. Qaçış, sürətli velosiped sürmək və ya pilləkənləri sürətlə qalxmaq buna nümunədir.
Araşdırma həmçinin göstərir ki, bu cür fəaliyyətləri gündəlik həyata daxil etmək çətin deyil. Lift əvəzinə pilləkənlərdən istifadə etmək, qısa məsafələrdə daha sürətli yerimək və ya interval məşqlər etmək kifayət edə bilər.
Mütəxəssislər vurğulayırlar ki, hətta qısa müddətli intensiv hərəkət belə sağlamlıq üçün faydalıdır. Bununla belə, yeni məşq proqramına başlamazdan əvvəl həkimlə məsləhətləşmək tövsiyə olunur.
Piranə Xasiyeva
