Ümumdünya Qeyri-Hökumət Təşkilatları Günü münasibətilə paytaxtda “Vətəndaş sektorunun Ədalətli Qazaxıstanın formalaşdırılmasında rolu” mövzusunda platforma keçirilib. Tədbirdə 100-dən çox QHT nümayəndəsi iştirak edib.
Görüş çərçivəsində sənətkarların yarmarkası təşkil olunub, QHT-lərin uğurlu layihələri təqdim edilib, vətəndaş cəmiyyətinin inkişafına töhfə vermiş təşkilatların təntənəli mükafatlandırılması mərasimi keçirilib.
Bildirilib ki, hazırda Qazaxıstanda 23 mindən çox aktiv QHT qeydiyyatdan keçib. Son beş il ərzində bu təşkilatlar tərəfindən 10 mindən artıq sosial layihə həyata keçirilib. Rəsmi məlumatlara əsasən, QHT-lərin ÜDM-ə töhfəsi təxminən 0,4% təşkil edir. Bununla yanaşı, real təsir könüllülük fəaliyyəti, xeyriyyəçilik və ekspert dəstəyi sahələrini də əhatə edir.
Kənd QHT-lərinin iştirakı əhəmiyyətli dərəcədə genişlənir – regional layihələrin sayı demək olar ki, iki dəfə artıb. 2017-ci ildən etibarən 550-dən çox təşkilat cəmiyyətin inkişafına verdiyi töhfəyə görə dövlət mükafatına layiq görülüb.
Tədbir zamanı QHT-lərin konstitusion dəyərlərin həyata keçirilməsində, ədalət, qanunçuluq və ictimai iştirak prinsiplərinin möhkəmləndirilməsində rolu da müzakirə olunub. Yeni Konstitusiya layihəsinə baxılıb, vətəndaş sektorunun islahatların ekspert müşayiətində və əhalinin məlumatlandırılmasında fəal mövqeyi vurğulanıb.
İştirakçılar qeyd ediblər ki, qeyri-hökumət sektorunun inkişafı daxili siyasət Konsepsiyasının həyata keçirilməsinin və vətəndaş cəmiyyətinin institusional əsaslarının daha da möhkəmləndirilməsinin mühüm elementidir.
