ADA Universiteti, BMT-nin Azərbaycandakı Nümayəndəliyi və Qoşulmama Hərəkatının Gənclər Təşkilatı (NAMYO) tərəfindən təşkil edilən xüsusi bir dialoqa ev sahibliyi etdi. "Gənclərin Liderlik Zamanıdır" mövzusu altında keçirilən bu tədbir, Azərbaycan və Qoşulmama Hərəkatına üzv dövlətlərin gənclərini bir araya gətirdi.
QHT.az xəbər verir ki, dialoq zamanı gənclər dayanıqlı inkişaf, sülh və innovasiya kimi aktual mövzularda fikir mübadiləsi apardılar. Onlar bu mövzular ətrafında qlobal problemlərin həllində öz töhfələrini vermək üçün birgə fəaliyyət yollarını müzakirə etdilər. Gənclər, gələcək dünya liderlərinə çatdırılacaq əsas mesajların hazırlanmasına da xüsusi diqqət yetirdilər. Tədbir iştirakçıları, bu cür dialoqların gənclərin liderlik bacarıqlarını inkişaf etdirmək və onların qlobal miqyasda səslərinin eşidilməsini təmin etmək üçün vacib olduğunu vurğuladılar. İştirakçılar arasında qlobal problemlərin həllinə yönəlik konkret təkliflər də səsləndirildi.
Tədbir sonunda, gənclər hazırladıqları mesajların dünya liderləri tərəfindən qəbul edilməsi və onların qərarlarına təsir göstərə bilməsi üçün öz tövsiyələrini paylaşdılar.
Pərvanə Fərhadqızı
QHT.az
