23 iyun tarixində “Azərbaycanda Qlobal Fondun 8-ci Qrant Dövrü (GC8) üzrə müraciəti üçün Vərəm Prioritetlərinə dair İcma Məsləhətləşməsi” mövzusunda mühüm tədbir keçirilib. Tədbirdə vərəmlə mübarizə sahəsində fəaliyyət göstərən vətəndaş cəmiyyəti təşkilatlarının nümayəndələri, icma təmsilçiləri və aidiyyəti tərəfdaşlar iştirak ediblər.
Görüşün əsas məqsədi 2027–2030-cu illəri əhatə edəcək yeni qrant dövrü üçün prioritet istiqamətlərin müəyyənləşdirilməsi olub. Məsləhətləşmə prosesinə Qlobal Fondun Layihə Əlaqələndirmə Bürosunun mütəxəssisləri də cəlb olunublar. Eyni zamanda Ölkə Əlaqələndirmə Komissiyasının nümayəndələri və digər maraqlı tərəflər müzakirələrdə iştirak ediblər.
Tədbirin gündəliyi ölkədə vərəmlə mübarizə proqramlarının gələcək inkişaf istiqamətlərinin müəyyənləşdirilməsinə həsr olunub. İştirakçılar mövcud vəziyyəti təhlil edərək qarşıda duran çağırışları və imkanları müzakirə ediblər. Xüsusilə icma əsaslı xidmətlərin əhatə dairəsinin genişləndirilməsi ilə bağlı təkliflər səsləndirilib. Vətəndaş cəmiyyətinin proqramların planlaşdırılması və icrasında rolunun gücləndirilməsi vacib məsələlərdən biri kimi dəyərləndirilib. Müzakirələr zamanı müxtəlif təcrübələr və praktiki yanaşmalar paylaşılıb.
Tədbirə beynəlxalq ekspert Dr Kakha Kepuladze onlayn formatda qoşularaq təqdimatla çıxış edib. O, vərəmlə mübarizə sahəsində beynəlxalq təcrübələrə əsaslanan tövsiyələrini iştirakçılarla bölüşüb. Ekspert icma təşkilatlarının proqramların uğurunda mühüm rol oynadığını vurğulayıb. Təqdimat zamanı davamlı nəticələrin əldə olunmasına xidmət edən mexanizmlər haqqında ətraflı məlumat verilib. İştirakçıları maraqlandıran suallar cavablandırılıb və fikir mübadiləsi aparılıb.
Dr.Kakha Kepuladze növbəti üç il ərzində Azərbaycan adından Qlobal Fonda təqdim olunacaq qrant müraciətinin hazırlanmasına dəstək göstərəcəyini bildirib. O, müraciətin vətəndaş cəmiyyətinin real ehtiyaclarını əks etdirməsinin vacibliyini qeyd edib. Bu məqsədlə QHT-lərin prioritetlərinin sənəddə dolğun şəkildə əks olunmasının əhəmiyyəti vurğulanıb. Ekspert vətəndaş cəmiyyəti sektorunun təcrübəsinin proqramların effektivliyini artırdığını diqqətə çatdırıb. Məhz buna görə də məsləhətləşmə prosesi iştirakçılıq prinsipləri əsasında təşkil olunub.
Tədbirdə Azərbaycan Vərəm əleyhinə QHT Koalisiyasının üzvləri öz təkliflərini və yanaşmalarını təqdim ediblər. Prioritet istiqamətlər müəyyənləşdirilərkən icmaların ehtiyaclarının nəzərə alınmasının vacibliyi qeyd olunub. Müzakirələr zamanı həssas əhali qruplarına yönəlmiş xidmətlərin gücləndirilməsi məsələsinə xüsusi diqqət ayrılıb. Eyni zamanda erkən aşkarlama, müalicəyə dəstək və maarifləndirmə fəaliyyətlərinin genişləndirilməsi təklif olunub. İştirakçılar gələcək maliyyələşmə imkanlarının bu istiqamətlərə yönəldilməsinin əhəmiyyətini vurğulayıblar.
Azərbaycan Vərəm əleyhinə QHT Koalisiyasının əsas üzvlərindən biri olan Vərəmsiz Gələcəyə Doğru İctimai Birliyi də tədbirə dəvət olunaraq müzakirələrdə fəal iştirak edib. Təşkilat nümayəndələri vərəmlə mübarizə sahəsində həyata keçirilən fəaliyyətlər və əldə olunmuş nəticələr barədə məlumat veriblər. Həmçinin icma əsaslı xidmətlərin daha da inkişaf etdirilməsi ilə bağlı təkliflər irəli sürüblər.
Təşkilatın mövqeyi gələcək qrant dövründə vətəndaş cəmiyyətinin iştirakının daha da gücləndirilməsinin vacibliyinə əsaslanıb. Müzakirələr zamanı dayanıqlılığın təmin olunması və proqramların daxili maliyyə mənbələrinə keçidi məsələləri də ön plana çıxıb. Bu istiqamətdə yerli potensialın inkişaf etdirilməsinin vacibliyi iştirakçılar tərəfindən dəstəklənib.
Tədbir nəticəsində formalaşan təkliflərin Qlobal Fondun 8-ci Qrant Dövrü üzrə müraciət sənədində nəzərə alınacağına dair ümumi razılıq ifadə olunub. Belə məsləhətləşmələr ölkədə vərəmlə mübarizə sahəsində vətəndaş cəmiyyətinin rolunun daha da güclənməsinə mühüm töhfə verir.
