Buz vannaları hüceyrələrin yenilənməsi mexanizmini aktivləşdirir
Kanadalı alimlər müəyyən ediblər ki, bir həftəlik soyuq vanna qəbul etmək hüceyrələrin özünütəmizləmə prosesi – autofagiyanı aktivləşdirir.
QHT.az xəbər verir ki, araşdırmaya görə, 14 °C temperaturda gündə bir saat suya girən sağlam kişilərdə autofagiya göstəricisi olan p62 zülalının səviyyəsi dördüncü gündən etibarən azalmağa başlayıb və yeddinci günə qədər bu tendensiya davam edib. Autofagiya hüceyrələrin zədələnmiş komponentləri məhv edərək onları yenidən emal etməsi prosesidir. Bu, hüceyrə sağlamlığını qoruyur və yaşlanma, xroniki xəstəliklər və iltihab riskini azaldır. Tədqiqat həmçinin apoptozla əlaqəli kaspaza-3 fermentinin aktivliyinin artdığını, bunun da bədənin yararsız hüceyrələrdən təmizləndiyini göstərdiyini üzə çıxarıb.
Alimlər hesab edirlər ki, soyuğa müntəzəm məruz qalma hüceyrələrin stresə davamlılığını artıraraq yaşlanmanı gecikdirə və bəzi xroniki xəstəliklərin simptomlarını yüngülləşdirə bilər. Bununla belə, nəticələrin dəqiqləşdirilməsi üçün daha genişmiqyaslı araşdırmalara ehtiyac var.