Məcburi köçkünlərin doğma yurdlarına qayıdışı ilə bağlı əsas çətinliklər və onların aradan qaldırılması istiqamətində görülən işlər barədə "Sağlam İnkişaf və Maarifləndirmə" İctimai Birliyinin rəhbəri Anar Xəlilov QHT.az-a açıqlama verib.

QHT sədrinin sözlərinə görə, əsas problem düşmən tərəfindən tamamilə dağıdılmış infrastruktur və yaşayış məskənlərinin bərpası ilə bağlıdır, lakin bu istiqamətdə genişmiqyaslı işlər aparılır:

"Cənab Prezidentin apardığı fəaliyyəti və şəxsi nəzarəti ilə böyük bərpa işləri dayanmadan Azərbaycanın öz gücü hesabına aparılır. Artıq məlum olduğu kimi böyük infrastruktur layihələri həyata keçirilib və artıq yaşayış məskənlərimiz böyük sürətlə bərpa olunmaqdadır. Hər həftə demək olar ki, keçmiş məcburi köçkünlərimiz bu işə cavabdeh olan Qaçqınların və Məcburi Köçkünlərin işləri üzrə Dövlət Komitəsi tərəfindən oz doğma yurdlarına köürülür. Doğma yaşayış məskənlərimiz bərpa olunması prosesi davam edir, eyni zamanda ən böyük problem olan minaların təmizlənmə əməliyyatları da davam etdirilir. Cənab Prezident İlham Əliyevin və I vitse-prezident Mehriban xanımın Torpaq Çərşənbəsi günü Ağdərə rayonunu bərpa olunmuş və məskunlaşma həyata keçirilmiş kəndlərimizdə sakinlərlə görüşməsi, bayram tonqalı yandırmalarını böyük fərəhlə izlədik. Bu bizə deməyə imkan verir ki, keçmiş məcburi köçkünlərin öz doğma yurdlarına qaytarılması prosesi böyük sürətlə davam etdirilir".

Anar Xəlilov qeyd edib ki, bu sürətli bərpa prosesi yaxın illərdə daha çox yaşayış məntəqəsinin tam məskunlaşmasına imkan yaradacaq və azad edilmiş torpaqlarda ənənəvi bayramların keçirilməsi adi hala çevriləcək:

"Torpaq Çərşənbəsi günü Xankəndində, Şuşada, Füzulidə, Laçında, Ağdərədə və s. yurdlarımızda məhz geriyə dönmüş sakinlərin bayram tonqalları alovlandırması bizlərə sevinc və qürur bəxş etdi. İnşallah bu istiqamətdə aparılan yenidənqurma işləri sayəsində biz yaxın illərdə daha çox yaşayış məskənlərimizdə bayramlarımızın məhz sakinlər tərəfindən qeyd edildiyinin şahidi olacağıq".

Pərvanə Fərhadqızı

QHT.az