Son illərdə sosial şəbəkələrdə çiy südün pasterizə edilmiş süddən daha faydalı olduğu ilə bağlı iddialar geniş yayılıb. Hətta məşhur Hollivud aktrisası Qvinet Peltrou da çiy südü seçən tanınmış şəxslər arasındadır. Bəs çiy süd həqiqətən daha faydalıdır, yoxsa sağlamlıq üçün təhlükə yaradır?
QHT.az xarici mediaya istinadən bildirir ki, son 10 ildə Böyük Britaniya və ABŞ-da çiy südün istehlakına maraq xeyli artıb. Sosial şəbəkələrdə bu məhsulla bağlı yüz minlərlə paylaşım edilir. Bir çox fenomen çiy südün həzmi asanlaşdırdığını, faydalı bakteriyalarla zəngin olduğunu və bağırsaq sağlamlığını dəstəklədiyini iddia edir.
Süd zülal, kalsium, vitamin və minerallarla zəngin qida məhsuludur. Bəzi insanlar pasterizasiya zamanı yüksək temperaturun təsiri ilə südün tərkibindəki faydalı maddələrin azaldığını düşünür.
Lakin Kanadada aparılan araşdırma pasterizasiyanın südün qida dəyərinə minimal təsir göstərdiyini ortaya qoyub. Tədqiqatçılar həmçinin istiliyə həssas olan bəzi vitaminlərin süddə onsuz da nisbətən az miqdarda olduğunu bildiriblər.
Pasterizasiya prosesi südün tərkibindəki potensial faydalı bakteriyalarla yanaşı, qida zəhərlənməsinə səbəb ola biləcək zərərli mikroorqanizmləri də məhv edir.
Ballymaloe Kulinariya Məktəbində aparılan müşahidə xarakterli kiçik bir araşdırmada çiy süd və süd məhsulları qəbul edən şəxslərin bağırsaq mikrobiomunda müəyyən fərqlər aşkarlanıb. Bununla belə, tədqiqat çiy südün sağlamlığa konkret fayda verdiyini sübut etmir.
Mütəxəssislər bildirirlər ki, çiy südün pasterizə edilmiş südlə müqayisədə sübut olunmuş əhəmiyyətli üstünlüyü yoxdur. Əksinə, onun tərkibində Salmonella, E. coli və Listeria kimi təhlükəli bakteriyalar ola bilər.
Bu səbəbdən çiy südün istehlakı sağlamlıq üçün risk yarada bilər. Xüsusilə uşaqlar, hamilə qadınlar, yaşlılar və immun sistemi zəif olan şəxslər üçün təhlükə daha yüksəkdir.
Beləliklə, südün qida dəyərindən faydalanmaq və mümkün infeksiya riskini azaltmaq üçün pasterizə edilmiş südün seçilməsi daha təhlükəsiz hesab olunur.
