Sosialogiya və ictimai səhiyyə sahəsində təhsil alan tələbələr cəmiyyətin sosial və sağlamlıqla bağlı problemlərini dərk etməyə və həll yolları təklif etməyə hazır olan gələcəyin mütəxəssisləridir.

Onların nəzəri biliklərinin praktiki təcrübə ilə tamamlanması isə olduqca vacibdir. Bu baxımdan qeyri-hökumət təşkilatları (QHT-lər), xüsusilə vərəmin profilaktikası kimi sahələrdə çalışan təşkilatlar, tələbələr üçün real təcrübə məkanı kimi mühüm rol oynaya bilər. QHT-lər tələbələrə sahə təcrübəsi qazanmaq, real layihələrdə iştirak etmək və nəzəri biliklərini praktik bacarıqlara çevirmək üçün geniş imkanlar təqdim edirlər. Maarifləndirmə kampaniyaları, təlimlər və tədqiqat layihələrində iştirak edən tələbələr həm sahə reallıqları ilə tanış olur, həm də gələcək karyeralarına dəyərli əlavə edirlər. Eyni zamanda, QHT-lərin topladığı statistik məlumatlar, hesabatlar və sorğular tələbələrin elmi araşdırmaları üçün zəngin mənbə rolunu oynayır. Bu əməkdaşlıq həmçinin mentorluq və şəbəkələşmə imkanları yaradır. Tələbələr sahədə təcrübəli mütəxəssislərlə əlaqə quraraq, gələcəkdə daha dərin əməkdaşlıq formaları üçün zəmin yarada bilirlər.

Belə əməkdaşlıqların daha da inkişaf etdirilməsi və təşviqi üçün bir sıra konkret addımlar atıla bilər. İlk növbədə, universitetlərlə QHT-lər arasında rəsmi əməkdaşlıq memorandumları bağlanaraq, tələbələr üçün təcrübə proqramları sistemli şəkildə qurula bilər. Eyni zamanda, QHT-lər öz könüllülük və təcrübə proqramlarını universitetlərdə elan etməli, fakültələrlə sıx əlaqə saxlamalıdırlar. Birgə seminar və vebinarların təşkili vasitəsilə tələbələrə QHT-lərin fəaliyyəti, sahə reallıqları və təcrübə imkanları barədə məlumat vermək mümkündür. Bundan əlavə, tələbələrin kurs və diplom işləri üçün QHT-lərlə birgə tədqiqatlar aparması təşviq edilməli, bu əməkdaşlıq həm tələbə, həm də təşkilat üçün faydalı olmalıdır. İştirakçılığı təşviq etmək məqsədilə QHT-lər könüllülərə tövsiyə məktubları, iştirak sertifikatları və simvolik mükafatlar təqdim etməklə motivasiya mexanizmlərini gücləndirə bilərlər.

Bu fəaliyyətlər Azərbaycan QHT institutlarının inkişafına kömək edərək, bu sahənin başqa ölkələrdə də tətbiq edilməsi və gələcək beynəlxalq təcrübə mübadilələri üçün bir örnək ola bilər. Beləliklə, yalnız yerli gənclərin inkişafına deyil, həm də qlobal əməkdaşlıq imkanlarına töhfə verilmiş olur.

Nəticə etibarilə, sosialologiya və ictimai səhiyyə üzrə təhsil alan tələbələrin QHT-lərlə əməkdaşlığı onların akademik və peşəkar inkişafına töhfə verir. Bu əməkdaşlığın sistemli təşviqi həm gənc mütəxəssislərin yetişməsi, həm də cəmiyyətin sosial və səhiyyə problemlərinin həllində daha güclü və davamlı nəticələrin əldə olunması baxımından əhəmiyyətlidir.
 

Çingiz Ramazanlı

"Vərəmsiz Gələcəyə Doğru" İctimai Birliyinin sədri