“Sağlam İnkişaf və Maarifləndirmə” İctimai Birliyinin rəhbəri Anar Xəlilov QHT.az-a verdiyi xüsusi açıqlamada XX əsrin əvvəllərində erməni təcavüzü nəticəsində xalqımıza qarşı törədilən faciələrin bir hissəsi olaraq Ağdaban faciəsini xatırlatdı.

QHT sədri bu faciənin həm xalqımıza, həm də insanlıq tarixinə vurulan ağır bir zərbə olduğunu vurğuladı. O, bildirib ki, 33 il əvvəl, müdafiəsiz və mühasirə vəziyyətində olan Ağdaban kəndində erməni qəsbkarları tərəfindən törədilən soyqırım, 779 nəfər dinc sakininin həyatına son qoymuş, çoxsaylı vəhşiliklərə səbəb olmuşdur. “67 nəfər qətlə yetirilmiş, 8 yaşlı sakin, 2 uşaq, 7 qadın diri-diri yandırılmışdır. Bu, Xocalı və Qaradağlı faciələrindən sonra törədilən növbəti dəhşətli hadisədir,” – deyə Anar Xəlilov qeyd edib.

“Bunlar xalqımızın qan yaddaşına əbədi həkk olunan faciələrdir,” deyən QHT sədri bu cür tarixlərin unudulmaması və daim işıqlandırılması vacibliyini vurğuladı. O, gənclərimizi bu faciələri unutmamağa, tarixdən dərs çıxarmağa və milli yaddaşı qorumağa çağırdı. "Biz gənc nəslin yalnız düşmənçilik və qisas tərbiyəsi ilə yetişdirilməsini demirik, məqsədimiz yaddaşında bu faciələri yaşayan və ehtiyat hissini qoruyan, sivil və güclü bir xalqın nümayəndəsi olan gənc nəslin yetişdirilməsidir," – dedi.

Anar Xəlilov həmçinin müasir informasiya texnologiyalarının və yazılı ədəbiyyatın bu faciələrin təbliğində vacib rol oynadığını qeyd edərək, gənclərin döyüşkən ruhunu, vətənpərvərliyini və sağlam əxlaqını qorumağın önəmli olduğunu bildirdi. "Cənab Ali Baş Komandan İlham Əliyevin rəhbərliyi altında Azərbaycan ordusunun qazandığı möhtəşəm qələbə, bu faciələrin qisasını almışdır. Bu qələbənin müsbət təsiri ilə gənclərimiz qürurla ‘azərbaycanlıam’ deyir və şəhidlərimizin ruhunu ehtiramla anır,” – deyə Anar Xəlilov əlavə etdi.

Nəhayət o, bu istiqamətdəki səylərin davam etdirilməli olduğunu və gənclərimizin yüksək təhsilini və sağlamlığını qorumağa yönəlik fəaliyyətlərə davam ediləcəyini vurğuladı.

Pərvanə Fərhadqızı

QHT.az