Beynəlxalq Mina Xəbərdarlığı və Mina Təhlükəsi ilə Mübarizəyə Yardım Günü: QHT sədrindən AÇIQLAMA
Hər il 4 aprel Beynəlxalq Mina Xəbərdarlığı və Mina Təhlükəsi ilə Mübarizəyə Yardım Günü olaraq qeyd olunur.
Bu günün əsas məqsədi, dünya miqyasında mina və partlamamış hərbi sursatların yaratdığı təhlükələrə qarşı daha çox diqqət cəlb etmək və bu problemlərin həllinə dəstək olmaqdır. Azərbaycanın "Minalar Əleyhinə Azərbaycan Kampaniyası" Birliyi də bu istiqamətdə mühüm fəaliyyətlər həyata keçirir. “Minalar Əleyhinə Azərbaycan Kampaniyası” İctimai Birliyinin sədri Hafiz Səfixanov QHT.az-a açıqlamasında bildirib ki, təşkilat xüsusilə 2020-ci ilə qədər həyata keçirilən 6 layihə çərçivəsində, 27 şəhər və rayonda mina qurbanlarına hüquqi, psixoloji dəstək və kiçik biznesin təşkili sahələrində maarifləndirici seminarlar təşkil etmişdir:
"Bu seminarlar 594 nəfərin iştirakını təmin etmiş və Füzuli, Tərtər, Qazax və Tovuz rayonlarından olan 7 mina qurbanına öz istədikləri kiçik biznes sahələri yaradılmışdır. Bundan başqa, təşkilat 2022-2024-cü illərdə, işğaldan azad olunmuş ərazilərdə mina və PHS problemlərini beynəlxalq ictimaiyyətə çatdırmaq məqsədilə təhqiqat apararaq hesabatlar hazırlamış və beynəlxalq icmaya təqdim etmişdir".
Hafiz Səfixanov təşkilatın fəaliyyətinin və əhəmiyyətinin artdığını, beynəlxalq səviyyədə mina təhlükəsizliyi mövzusunda diqqətin artırılmasında mühüm rol oynadıqlarını vurğulamışdır.
Pərvanə Fərhadqızı
QHT.az