Göllər inanılmaz sürətlə oksigen itirir: elm adamları həyəcan təbili çalır
Alimlər xəbərdarlıq ediblər ki, sulardakı oksigen səviyyəsinin azalması bəzi heyvan növlərinin populyasiyalarının məhvinə səbəb ola bilər.
QHT.az xəbər verir ki, iqlim dəyişikliyi göllərdə oksigen çatışmazlığı yaradır. Yeni tədqiqatlara görə, iqlim dəyişikliyi nəticəsində şirin su göllərində oksigen səviyyəsi kəskin azalır. Nankin Coğrafiya və Limnologiya İnstitutunun apardığı araşdırmada 15 mindən çox göl analiz edilib və onların 80%-dən çoxunda oksigen səviyyəsinin azaldığı müəyyən olunub. Alimlərin fikrincə, göllərdə oksigen itkisi okeanlara və çaylara nisbətən daha sürətli baş verir. Oksigen çatışmazlığı balıq və digər canlıların yaşaması üçün təhlükə yaradır, həmçinin su keyfiyyətini azaldır, bakteriyaların artmasına səbəb olur və içməli suyun dad və qoxusunu dəyişə bilər.
Əsas səbəb temperaturun yüksəlməsi və qısamüddətli istilik dalğalarıdır. Eyni zamanda, evtrofikasiya (qida maddələrinin artıqlığı) da bu prosesi sürətləndirir. Alimlər vəziyyəti yaxşılaşdırmaq üçün kənd təsərrüfatı axıntılarını azaltmaq, gübrələrin ağıllı istifadəsi və çirkab suların təmizlənməsinə sərmayə yatırmağı tövsiyə ediblər.
Pərvanə Fərhadqızı