“Apple” şirkətinin ilk qatlanan smartfonu “iPhone Duo”dan böyük gəlir əldə etmək ümidi ilə əvvəlcədən cihaz ehtiyatı toplayan alverçilər gözlədiklərinin əksinə, ciddi zərərlə üzləşiblər. Telefonun ikinci əl bazarında satış qiymətləri qısa müddətdə sürətlə aşağı düşüb.

QHT.az xarici mediaya istinadən bildirir ki, xüsusilə Çində “iPhone Duo”nun satışından yüksək qazanc əldə etməyi planlaşdıran vasitəçilər hazırda cihazları zərərlə satmaq məcburiyyətində qalırlar.

Texniki problemlər alıcı marağını azaltdı

Məlumata görə, telefonun menteşə mexanizmi ilə bağlı problemlər və proqram təminatının tam hazır olmadığına dair təəssürat alıcıların marağına mənfi təsir göstərib.

Nəticədə ikinci əl bazarında cihazın qiyməti gözləniləndən daha sürətlə aşağı düşüb. Bildirilir ki, Çində “iPhone Duo”nun satışını həyata keçirən alverçilərin əksəriyyəti hazırda zərərlə üzləşib. Bəzi təcrübəli satıcıların itkilərinin on minlərlə, hətta yüz minlərlə yuan olduğu iddia edilir.

İkinci əl bazarında tələbat azalıb

Mütəxəssislərin fikrincə, sosial şəbəkələr və texnologiya platformaları yeni cihazlarla bağlı məlumatların sürətlə yayılmasına imkan verir. Bu isə əvvəllər alverçilərə üstünlük qazandıran informasiya çatışmazlığını aradan qaldırıb.

Bundan başqa, cihazın təklifinin gözləniləndən daha sürətlə artması yüksək qiymətə satış imkanlarını məhdudlaşdırıb. İlkin maraq dalğası səngidikdən sonra ikinci əl bazarında alıcı sayının da xeyli azaldığı bildirilir.

Yüksək satış qiyməti də real alıcıların sayını məhdudlaşdıran əsas amillərdən biri kimi göstərilir.

Beləliklə, böyük qazanc ümidi ilə ehtiyat toplayan satıcılar gözlənilməz qiymət enişi ilə üzləşiblər.