Mediasiya Şurası Qanunvericilik, normativ - hüquqi aktlar, Şuranın Nizamnaməsi və Şuranın İdarə Heyəti tərəfindən təsdiq edilən Qərarlardan irəli gələn nəzarət, tənzimləmə və qiymətləndirmə səlahiyyətlərinin həyata keçirilməsi məqsədi ilə Mediasiya Şurası tərəfindən 2024-cü ilin təqvim planına uyğun olaraq region mediasiya təşkilatlarında monitorinqlər həyata keçirir.

QHT.az xəbər verir ki, 5 sentyabr 2019-cu il “Mediatorların peşəkar etik davranış Qaydası”nın təsdiq edilməsi haqqında AZƏRBAYCAN RESPUBLİKASI NAZİRLƏR KABİNETİNİN QƏRARI (https://e-qanun.az/framework/43221) mediasiya təşkilatları və mediatorlar tərəfindən icrasının monitorinq edilməsi və ortaya çıxan nöqsanların aradan qaldırılmasına nail olmaq, əldə edilmiş uğurların isə qiymətləndirilməsi məqsədi ilə Mediasiya Şurası İdarə Heyətinin 26 fevral 2024-cü il tarixli Qərarı ilə Mediasiya Şurasının Etika Komitəsinə həvalə edilib.

Mediasiya Şurasının Etika Komitəsinin sədri Aqil Əsgərov və Komitənin üzvü Tural Məmmədov tərəfindən Lənkəran şəhərinə səfər zamanı Lənkəran 1 saylı Mediasiya Təşkilatının rəhbərliyi və mediatorlarla birgə Azərbaycan xalqının Ümummilli Lideri Heydər Əliyevin abidəsi ziyarət edilib, Ulu öndər ehtiramla anılmış və abidə önünə gül dəstələri qoyulub.

Təqvim planına əsasən Lənkəran 1 saylı mediasiya təşkilatında monitorinqlər aparılıb, monitorinqlərdə Mediasiya Şurasının Etika Komitəsinin sədri Aqil Əsgərov, Komitənin üzvü Tural Məmmədov, Lənkəran 1 saylı mediasiya təşkilatının rəhbəri Ramin Şükürov və Lənkəran 1 saylı mediasiya təşkilatı ilə əməkdaşlıq edən mediatorlar iştirak edib.

Müzakirələrdə təşkilatın marketinq fəaliyyəti, uğurlu barışıq sazişlərinin keyfiyyət göstəriciləri və vətəndaş məmnunluğuna müsbət təsir edən məqamlar, o cümlədən, qarşıda duran işlər geniş müzakirə edilib.

Həmçinin mediatorlar Lənkəran İcra Hakimiyyətinin başçısı Taleh Qaraşovla görüşüb.