İraq Türkmən Birliyi və Həmrəylik Dərnəyi fəaliyyətə başlamasının 25-ci ildönümünü Antalya Yörüklər Dərnəyinin mərkəzində təşkil olunan möhtəşəm gecə ilə qeyd edib. Dərnəyin ev sahibliyi, Antalya Yörüklər Dərnəyinin dəstəyi ilə keçirilən tədbirdə protokol nümayəndələri, müxtəlif siyasi partiyaların, Türk dünyasının, bürokratiyanın, işgüzar, incəsənət və ictimaiyyət dairələrinin, eləcə də vətəndaş cəmiyyəti təşkilatlarının təmsilçiləri, dərnək üzvləri, onların ailələri və çoxsaylı qonaqlar iştirak ediblər.
Tədbir şəhidlərin xatirəsinin bir dəqiqəlik sükutla yad edilməsi, Türkiyənin İstiqlal Marşının və Türkməneli Milli Marşının səsləndirilməsi ilə başlayıb. Gecənin aparıcısı İraq Türkmən Birliyi və Həmrəylik Dərnəyinin Çağdaş Türk Xalq Musiqisi Xorunun rəhbəri Arzu Dede olub. Tədbir incəsənət, birlik, bərabərlik və həmrəylik ruhunda keçib.
Gecədə çıxış edən İraq Türkmən Birliyi və Həmrəylik Dərnəyinin sədri, doktor Kürşat Çavuşoğlu bildirib ki, təşkilat 25 illik təcrübə və etimadla gələcəyə cəsarətli, planlı və qətiyyətli addımlarla irəliləyir.
O qeyd edib ki, 2001-ci ildə əkilən möhkəm toxum bu gün böyük bir çinara çevrilib və dərnəyin uğurları ölkə hüdudlarından kənara çıxıb.
Çavuşoğlunun sözlərinə görə, əldə edilən nailiyyətlər təsadüfi deyil, gecə-gündüz çalışan idarə heyətinin, maddi və mənəvi dəstəyini əsirgəməyən üzvlərin və dərnəyə könül verən dostların birgə əməyinin nəticəsidir.
O vurğulayıb ki, 100-dən çox ölkədən insanı qəbul edən Antalya mədəniyyətlərin qovuşduğu əsl beynəlxalq məkandır. Dərnək bu beynəlxalq mühitdə İraq türklərini, onların bayrağını, üzləşdikləri haqsızlıqları və çətinlikləri dünyaya çatdırmağa, həmçinin İraq türklərinin mədəniyyətini, incəsənətini və musiqisini tanıtmağa çalışır.
Dərnəyin Antalya şəhərindəki xarici ölkə nümayəndəlikləri ilə yaxşı münasibətlər qurduğunu bildirən Çavuşoğlu təşkilatın şəhərdə bir brendə çevrildiyini, hər kəs tərəfindən hörmətlə qarşılandığını deyib. O, 25 il ərzində müxtəlif dairələrlə yaxşı əlaqələr qurduqlarını və əldə olunan uğurlarda hər kəsin payı olduğunu qeyd edib.
Çavuşoğlu tədbirin təşkilində əməyi olan əməkdaşlara, dəstək göstərən tərəfdaşlara və mərasimdə iştirak edən qonaqlara dərnəyin idarə heyəti adından təşəkkür edib. O, çıxışını “Yaxşı ki, varsınız. Biz birlikdə güclüyük!” sözləri ilə tamamlayıb.
Antalya Yörüklər Mədəniyyət, Həmrəylik və Yardımlaşma Dərnəyinin sədri Abdullah Duman da çıxışında İraq Türkmən Birliyi və Həmrəylik Dərnəyinin 25 illik fəaliyyətini yüksək qiymətləndirib.
Duman bildirib ki, bu gün onlar yalnız bir dərnəyin və ya vətəndaş cəmiyyəti təşkilatının yubileyini qeyd etmirlər. Onlar eyni zamanda Kərkük küçələrində səslənən türkcəni, Təlafərin qəhrəmanlığını, Tuzhurmatunun müqavimətini, Ərbil və Bağdadın sədaqətli insanlarının 25 illik yaddaşını və mübarizəsini yad edirlər.
O, bir gün bu mübarizənin xoşbəxt sonluğunu hamılıqla görəcəklərinə inandığını bildirib.
İraq türklərinə daim dəstək göstərən Döşemealtı rayonunun kaymakamı Ünal Çakıcı da çıxışında Kərkükün həyatında mühüm yer tutduğunu söyləyib.
Çakıcı keçmişə və gələcəyə nəzər salaraq Oğuz xanın əkdiyi ağac haqqında bənzətmə ilə fikirlərini ifadə edib. O bildirib ki, həmin ağacın müxtəlif budaqlarında alma, armud və başqa meyvələr yetişdiyi kimi, bu gün də Anadolu türkləri, türkmənlər, qırğızlar, qazaxlar, özbəklər və digər xalqlar böyük bir ağacın fərqli budaqlarıdır.
O, gələcəkdə bu xalqların birlikdə bərəkət, əmin-amanlıq və sülh içində yaşayacaqlarına ümid etdiyini bildirib.
“Antalya belə möhtəşəm gecə yaşamayıb!”
Tədbirdə İraq türklərinin tanınmış sənətçisi İbrahim Rauf Terzi, Arzu Dede, Səlahəddin Kazanoğlu, Gülnaz Cihan, Melahat Yücetürk, Ayhan Dirol, Ayşegül Yılmaz, Nazife Yıldız, Hasan Ateşok, eləcə də Esma və Muhammet Kerküklü qardaş-bacıları səhnəyə çıxıblar.
Sənətçilər sevilən Kərkük mahnılarını ifa edib, iştirakçıların böyük rəğbətini qazanıblar. Gecə musiqi ilə zəngin, yaddaqalan anlarla yadda qalıb. Tədbirin sonunda “Antalya belə möhtəşəm gecə yaşamayıb!” ifadəsi səsləndirilib.
İraq Türkmən Birliyi və Həmrəylik Dərnəyinin 25 illik yubiley mərasimi çərçivəsində təşkilatın fəaliyyətinə töhfə verən şəxslərə xatirə lövhələri təqdim olunub.
Proqram yubiley tortunun kəsilməsi və xatirə fotosunun çəkilməsi ilə başa çatıb.
İraq Türkmən Jurnalistlər Cəmiyyətinin xarici əlaqələr üzrə məsul şəxsi, doktor Kürşat Çavuşoğlu
