Müasir Azərbaycan dövlətçiliyinin banisi Ulu Öndər Heydər Əliyevin əsasını qoyduğu milli inkişaf strategiyası bu gün Prezident İlham Əliyevin rəhbərliyi ilə yeni mərhələyə qədəm qoyub. Bu siyasətin təməlində bütöv Azərbaycanın hər bir bölgəsinin bərabər inkişafı, vətəndaşların layiqli həyat şəraitinin təmin olunması dayanır. Prezident İlham Əliyevin həyata keçirdiyi regional inkişaf siyasəti ölkəmizin həm iqtisadi gücünü artırır, həm də sosial bərabərliyi təmin edir.

Yenicag.az xəbər verir ki, bu sözləri Milli Məclisin deputatı Səbinə Salmanova deyib.

Onun sözlərinə görə, dövlət başçısının Yevlax və Goranboy rayonlarına, Mingəçevir şəhərinə səfəri bu siyasətin növbəti real təzahürüdür:

“Yevlax şəhərində ilk olaraq Ulu Öndər Heydər Əliyevin abidəsini ziyarət edən Prezident, daha sonra Bakı–Ələt–Qazax–Gürcüstan dövlət sərhədi avtomobil yolunun Yevlaxdan keçən hissəsində görülən işlərlə tanış oldu. Bu yol təkcə region üçün deyil, bütün ölkə üçün strateji nəqliyyat arteriyası hesab olunur. Yolun müasirləşdirilməsi logistika imkanlarının genişləndirilməsinə, tranzit potensialının daha da artırılmasına imkan verəcək. Bunun ardınca Yevlax Pilot Aqroparkının, SCADA İdarəetmə Mərkəzinin, yeni sutəmizləyici qurğunun, Yevlax Olimpiya İdman Kompleksinin istifadəyə verilməsi regionda kənd təsərrüfatı, kommunal xidmətlər, idman və sosial sahələrin müasirləşməsini təmin edir. Goranboy rayonunda isə Prezident İlham Əliyev “Konstralab Industries” QSC-nin tikinti materialları istehsalı zavodunun açılışında iştirak etdi. Bu müəssisə region üçün sənaye baxımından yeni bir nəfəs, əhali üçün isə əlavə məşğulluq imkanı deməkdir”.

Parlamentari vurğulayıb ki, iyunun 24-də Azərbaycanın energetika sahəsində mühüm bir mərhələ baş tutdu:

“Mingəçevirdə inşa edilən “8 Noyabr” Elektrik Stansiyası istifadəyə verildi. Prezident İlham Əliyevin iştirakı ilə keçirilən açılış mərasimi bu layihənin ölkə üçün strateji əhəmiyyət daşıdığını bir daha göstərdi. Yeni elektrik stansiyası Azərbaycanın enerji təhlükəsizliyinin təmin olunmasında, sənayenin və iqtisadiyyatın davamlı inkişafında mühüm rol oynayacaq. Qısa müddətdə və yüksək keyfiyyətlə inşa edilən bu layihə ölkənin texniki imkanlarının, mühəndis və energetiklərinin peşəkarlığının göstəricisidir.

O söyləyib ki, “8 Noyabr” Elektrik Stansiyası müasir texnologiyalarla təchiz olunub və yüksək səmərəliliyə malikdir:

“Bu isə həm daxili enerji tələbatının ödənilməsində, həm də enerji ixrac potensialının artırılmasında önəmli rol oynayacaq. Eyni zamanda, bu stansiya ekoloji baxımdan da müasir standartlara cavab verir. Bu layihə Azərbaycanın gücünü və inkişaf yolunda atdığı qətiyyətli addımları nümayiş etdirir. Bu kimi iri enerji layihələri ölkənin iqtisadi qüdrətini artırmaqla yanaşı, regionların sosial-iqtisadi inkişafına da təkan verir. “8 Noyabr” Elektrik Stansiyasının istifadəyə verilməsi Azərbaycanın enerji sektorunda daha bir uğurlu addımı kimi tarixə düşüb”.

Deputat bildirib ki, hazırda işğaldan azad edilmiş ərazilərdə aparılan genişmiqyaslı bərpa və yenidənqurma işləri ilə yanaşı, ölkənin bütün bölgələrində də inkişaf prosesləri paralel şəkildə həyata keçirilir: “Bu yanaşma Prezident İlham Əliyevin ədalətli və sistemli idarəçilik modelinin təzahürüdür. Prezidentin Yevlax və Goranboy rayonlarına və Mingəçevir şəhərinə səfəri bir daha təsdiq edir ki, Azərbaycan hökuməti yalnız işğaldan azad edilmiş ərazilərin deyil, ölkənin bütün bölgələrinin inkişafını prioritet hesab edir. Ölkə başçımız da dəfələrlə vurğulayıb ki, Qarabağ və Şərqi Zəngəzurda həyata keçirilən layihələr digər regionların inkişafı ilə paralel və balanslı şəkildə aparılır. Bu məqsədlə Azərbaycanımızın hər yerində müasir infrastruktur yaradılır, kənd təsərrüfatı və sənaye sahələrinə investisiyalar yatırılır, yeni iş yerləri açılır. Bütün bunlar ölkəmizdə sosial-iqtisadi sabitliyə və vətəndaşımızın rifahının yüksəlməsinə şərait yaradır”.