Bakı Reabilitasiya Mərkəzinin direktoru Vüsalə Kazımova və “İnformasiya və Sosial Təşəbbüslərə Dəstək” İctimai Birliyinin sədri Cəsarət Hüseynzadə DOST TV-nin “Dayaq nöqtəsi” verilişinin qonaqları olublar. 

Verilişin aparıcısı İsmayıl Balacanovun suallarını cavablandıran Vüsalə Kazımova bildirib ki, Reabilitasiya Mərkəzlərinin əsas vəzifəsi əlilliyi olan şəxslərin reabilitasiya potensialını qiymətləndirməkdir:

“Əlilliyi olan şəxslərə özünəxidmət, ünsiyyət və peşə vərdişlərini formalaşdırmaq üçün tibbi və psixoloji dəstək göstərilir.”

Cəsarət Hüseynzadə isə vətəndaş cəmiyyətinin əlilliyi olan şəxslərlə bağlı fəaliyyətindən danışıb. O bildirib ki:

“Qeyri-hökumət təşkilatları reabilitasiya xidmətlərinə əlçatanlığın təmin olunmasında körpü rolunu oynayır. Əlilliyi olan şəxslərin cəmiyyətə inteqrasiyası üçün müxtəlif təşəbbüslər və layihələr həyata keçirilir. Regional DOST Mərkəzlərində yaradılan şərait, göstərilən xidmətlər və çalışan peşəkar komanda yüksək dəyərləndirilir. Hüquqların müdafiəsi və hüquqi maarifləndirmə QHT-lərin əsas fəaliyyət istiqamətlərindəndir.”