İqtisadçı ekspert Aslan Əzimzadə QHT.az-a özəl açıqlamasında xaricə pul axınlarının artmasının ölkə iqtisadiyyatına ciddi təsir göstərə biləcəyini bildirib. Onun sözlərinə görə, bu axınlar düzgün tənzimlənməzsə, maliyyə sisteminə zərbə vuraraq devalvasiya riskini artırır.

A. Əzimzadə, beynəlxalq təcrübəyə istinad edərək, kapitalın transsərhəd hərəkətinin azad və liberal olmasının tərəfdarı deyil. O qeyd edib ki, beynəlxalq valyuta fondunun tövsiyələrinə əməl etməyən ölkələrdə maliyyə sistemlərinin daha dayanıqlı və uğurlu olduğunu müşahidə etmək olar.

Ekspert həmçinin vurğulayıb ki, Azərbaycandan xaricə pul axınlarının məhdudlaşdırılması üçün mövcud qanunvericilik bazası olsa da, gizli iqtisadiyyat və qeyri-rəsmi pul köçürmələri məsələləri hələ də aktualdır. Əzimzadə bu proseslərin izlənilməsi və tənzimlənməsi üçün innovativ texnologiyaların, o cümlədən blokçeyn texnologiyasının istifadə edilməsinin vacibliyini qeyd edib.

Nəticə olaraq, ekspert kapitalın transsərhəd hərəkətinin daha effektiv tənzimlənməsi üçün yeni metodların tətbiq edilməsinin zəruriliyini vurğulayıb.

Pərvanə Fərhadqızı

QHT.az