"Zəfər" Şəhid Ailələrinə Dəstək İctimai Birliyinin sədri Sevinc Orucova Çexiyanın ən nüfuzlu universitetlərindən biri olan "Charles" Universitetinə qəbul olan Vətən Müharibəsi Qəhrəmanı, şəhid polkovnik-leytenant Əfqan Abdurahmanovun oğlu Əlibəy Abdurahmanov ilə təşkilatın ofisində görüşüb.

QHT.az xəbər verir ki, əldə etdiyi bu yüksək nailiyyətə görə Əlibəyi təbrik edən Sevinc Orucova ona gələcək təhsil həyatında uğurlar arzulayıb və bundan sonra da daim onun yanında olacaqlarını bildirib. Oktyabrın 7-də Əlibəy Abdurahmanov təşkilatın idarə heyətinin üzvlərinin iştirakı ilə Çexiyaya yola salınıb.

Təşkilatdan bildirilib ki, Çexiyada təhsil aldığı müddət ərzində Əlibəy Abdurahmanovu təqaüdlə təmin edəcək Rəqəmsal İnkişaf və Nəqliyyat Nazirliyi və Azərbaycan Diasporuna Dəstək Fonduna, həmçinin gəncimizin Çexiyaya səfər biletlərinin təmin olunmasına dəstək göstərən "Azərbaycan Hava Yolları"na bir daha öz dərin təşəkkürlərimizi bildiririk.

QHT.az olaraq biz də Əlibəy Abdurahmanovu əldə etdiyi bu böyük uğur münasibətilə təbrik edir, təhsilində və gələcək fəaliyyətlərində daim yeni zirvələr fəth etməsini arzulayırıq! Ona dəstək olan bütün qurumlara da minnətdarlığımızı bildiririk.