Bakı Ekspo Mərkəzində keçirilən 10-cu Bakı Beynəlxalq Kitab Sərgisi böyük maraqla davam edir. Sentyabrın 30-da start götürən sərgi, kitab həvəskarları və nəşriyyat nümayəndələrini bir araya gətirərək, Azərbaycanın və xarici ölkələrin mədəniyyət və ədəbiyyatının təbliğinə mühüm töhfə verir.

QHT.az xəbər verir ki, sərgidə yerli və xarici nəşriyyatlar, kitab mağazaları və müəlliflər geniş çeşiddə nəşr olunan əsərlərini təqdim edirlər. Eyni zamanda, sərgi çərçivəsində müxtəlif kitab təqdimatları, imza günləri, müzakirələr və oxucularla görüşlər təşkil olunur. Bu tədbirlər vasitəsilə oxucular ən son nəşrlərlə tanış olmaq və sevdikləri müəlliflərlə görüşmək imkanı qazanırlar.

Kitab həvəskarları, müəllimlər, tələbələr və valideynlər üçün əhəmiyyətli bir mədəniyyət platformasına çevrilən Bakı Beynəlxalq Kitab Sərgisi oktyabrın 8-dək davam edəcək. Sərginin məqsədi Azərbaycanda kitab mədəniyyətinin inkişafını dəstəkləmək və oxucular arasında kitab oxuma vərdişini daha da gücləndirməkdir.