Azərbaycanın Milli Qəhrəmanı Fəxrəddin Musayevin doğum günüdür
Azərbaycan Silahlı Qüvvələrinin baş leytenantı olan Fəxrəddin Musayev 30 iyul 1957-ci ildə Türkmənistan Respublikasının Bayramalı şəhərində anadan olub.
QHT.az xəbər verir ki, 1964–1974-cü illərdə burada təhsil alıb. 1975-ci ildə hərbi xidmətə çağırılıb, Çexoslovakiyada, sonra isə Orenburq vilayətində xidmət edib. 1979-cu ildə Mülki Aviasiya Məktəbinə daxil olub. 1982-ci ildə bu məktəbi fərqlənmə diplomu ilə bitirib. Milli Ordu yarandıqdan sonra o, Vətənə dönüb və Qarabağda aparılan hərbi əməliyyatlarda iştirak edib. Fəxrəddin sərrast raket zərbələri ilə erməni işğalçılarının xeyli canlı qüvvəsini və zirehli texnikasını məhv edib. O, 1992-ci ilin 11 aprel tarixində Füzuli rayonu istiqamətində döyüş tapşırığını yerinə yetirərkən qəhrəmancasına şəhid olub.
Azərbaycan Respublikası Prezidentinin 7 iyun 1992-ci il tarixli Fərmanı ilə Musayev Fəxrəddin Musa oğlu ölümündən sonra "Azərbaycanın Milli Qəhrəmanı" adına layiq görülüb.
Ruhu şad olsun!